Verbum patris humanatur, O, O! dum puella salutatur, O, O! salutata fecundatur viri nescia. Ey, ey, eya, nova gaudia! Novus modus geniture, O, O! sed excedens vim nature, O, O! dum unitur creature creans omnia. Ey, ey, eya, nova gaudia! Audi partem preter morem, O, O! virgo parit salvatorem, O, O! creatura creatorem, patrem filia. Ey, ey, eya, nova gaudia! In parente salvatoris, O, O! non est parens nostri moris, O, O! virgo parit, nec pudoris marcent lilia. Ey, ey, eya, nova gaudia! Homo Deus nobis datur, O, O! datus nobis demonstratur, O, O! dum pax terris nuntiatur, celis gloria. Ey, ey, eya, nova gaudia!
https://primanota.net/anonymous/verbum-patris-humanatur.htm