Den iiii. Psalm Hooghe te singhen Cum invocarem. Nae die wyse. Het daghet in den oosten, het lichtet (overal) Als ick riep met verlanghen God hoorde al myn leyt Wanneer my droefheyt heeft bevanghen Ghi heere my troost verbreyt. O Heer wilt myns ontfermen End aenhoort myn gheclach. Myn bidden, ende myn kermen Wilt hooren nacht en dach. Ghi mannen swaer van sinnen Waer om yst u gherief Dat ghi wilt ydelheyt beminnen End hebben die loeghens lief ? Bekent hoe God den sinen Seer wonderlyck heeft ghedaen. Hy hoort my tallen terminen Wanneer ick hem roep aen. Verschrict, en schoudt het quade Uwer herten doet vermaen Hebt rouwe, vroech, en spade, Van dyes ghi hebt misdaen. Gheeft God u offerhande Dats, hem seer vast betroudt. Ghi blyft wt alle schande Hy eest die u behoudt. Veel zynder, die daer spreken Wie sal ons verthoonen het goet ? Dyn licht is over ons ontsteken. Ghi maect bly minen moet. Sy zyn na haerder lusten Met alle gheluck versaet. In dy Heer wil ick rusten Myn hoep, myn toeverlaat. Want ghi mi hier o Heere In bisonderen hope stelt Soe dat ick nu tot allen keere Seer veylich gae opt velt.
https://primanota.net/jacobus-clemens-non-papa/souterliedekens-psalm-4-lyrics.htm