Ян Петерсзон Свелинк - Pseaume 98 - ноты, текст песни (слова)

Chantez à Dieu nouveau cantique, 
 Car il a puissamment ouvré:
 Et par sa force magnifique,
 Par soy mesme il s'est delivré.
 Dieu a faict le salut congnoistre,
 Par lequel sommes garentis,
 Et sa justice faict paroistre
 En la presence des Gentils.
 
 De sa bonté plus cordiale,
 Il luy a pleu se souvenir,
 Et de sa verité loyale,
 Pour son Israël maintenir.
 Le salut que Dieu nous envoye
 Jusqu'au bout du monde s'est veu:
 Sus donc, qu'en plaisir et en joye
 Tout cest univers soit esmeu.
 
 Qu'on crie, qu'on chant' et resonne
 Et de la harp' et de la voix:
 Que devant Dieu, dije,on  entonne
 Nouveaux cantiques ceste fois.
 Devant sa face glorieuse
 Cors et clairons soyent esclatans:
 Tonne la grand' mer spatieuse,
 Et le mond' et ses habitans.
 
 Que devant Dieu les fleuves mesme
 Frappent des mains tous esjouïs, 
 Voire crier, de joye extreme
 Les plus durs rochers soyent ouïs.
 Car il vient regir et conduire
 Tout cest univers, et sera
 Just' et droiturier son empire,
 Quand tout peupl' il gouvernera.