Philipp Goldmann - Die Loreley - Ein tragisch Spektakel - текст песни (слова)

Ich weiß nicht, was soll es bedeuten,
 dass ich so traurig bin...
 
 Ich weeß nich, mir isses so gomisch
 un ärchendwas macht mich verschtimmt.
 S'is meechlich, das is anadomisch,
 wie das ähmd beim Mänschen oft gimmt.
  
 De Älwe, die bläddschert so friedlich,
 ä Fischgahn gommt aus dr Tschechei.
 Drin sitzt 'ne Familche gemiedlich,
 nu sinse schon an dr Bastei.
  
 Un ohm uffn Bärche, nu gugge,
 da gämmt sich ä Freilein ihrn Zobb.
 Se schtriecheltn glatt hibbsch mit Schbugge,
 dann schtechtsn als Gauz uffn Gobb.
  
 Dr Vader da unten im Gahne
 glotzt nuff bei das Weib gans entzickt.
 De Mudder meent draurich: "Ich ahne,
 die macht unsern Babbah verrickt."
  
 Nu fängt die da ohm uffn Fälsen
 zu sing ooch noch an ä Gebbläch.
 Dr Vader im Gahn dud sich wälsen
 vor Freiden un jodelt: "Juchheh!"
  
 "Bis schtille", schreit ängstlich Ottilche.
 Schon gibbelt gans forchtbar dr Gahn,
 un blätzlich versinkt de Familche ...
 Nee, Freilein, was hamse gedan!
 (Lene Voigt)