Alfonso Maria de' Liguori - Quanno nascette Ninno - ноты, текст песни (слова), перевод

Quanno nascette Ninno a Bettalemme
 Era notte, e pareva miezo juorno.
 Maje le stelle - lustre e belle 
 Se vedetteno accussì:
 E 'a cchiù lucente 
 Jett'a chiammà li Magge a l'Urïente. 
 
 De pressa se scetajeno l'aucielle
 Cantanno de 'na forma tutta nova.
 Pe' 'nsi' 'e grille - co' li strille 
 E zombanno a ccà e a llà;
 È nato, è nato, 
 Decevano, lu Dio che nc'à crïato. 
 
 No' nc'erano nemmice pe' la terra,
 La pecora pasciva co' [lu] lione;
 Co' 'o crapette - se vedette 
 'O liupardo pazzïà;
 L'urz' e 'o vitiello 
 E co' lu lupo 'n pace 'o pecoriello. 
 
 Se rrevotaje 'nsomma tutt' 'o Munno,
 Lu cielo, 'a terra, 'o mare, e tutt'i gente.
 Chi dormeva - se senteva 
 'N piett' 'o core pazzïà
 Pe' la prïezza; 
 E se sonnava pace e contentezza.
 
 Guardavano le pecore 'e Pasturi,
 E 'n Angelo sbrennente cchiù d'o sole
 Comparette - e le decette: 
 No[n] ve spaventate no;
 Contento e riso, 
 La terra è arreventata Paraviso.
 
 A buje è nato ogge a Bettalemme
 D' 'u Munno l'aspettato Sarvatore.
 Dint'i panni 'o trovarrite, 
 Nu potite - maje sgarrà,
 Arravugliato, 
 E dinto a lu Presebio cur[ë]cato.