Ян Петерсзон Свелинк - Pseaume 36 - ноты, текст песни (слова)

Du malin le meschant vouloir 
 Parle en mon cœur, et me fait voir,
 Qu'il n'a de Dieu la crainte:
 Car tant se plaist en son erreur,
 Que l'avoir en haine et horreur
 C'est bien force et contrainte.
 Son parler est nuisant et fin:
 Doctrine va fuyant, à fin
 De jamais bien ne faire:
 Songe en son lict meschanceté,
 Au chemin tors est arresté,
 A nul mal n'est contraire.
 
 O Seigneur, ta benignité
 Touche aux cieux, et ta verité
 Dresse aux nues la teste:
 Tes jugements semblent hauts monts,
 Un abysme tes actes bons 
 Tu gardes home et beste.
 O que tes graces nobles sont
 Aux hommes qui confiance ont
 En l'ombre de tes aisles.
 De tes biens soules leurs desirs,
 Et au fleuve de tes plaisirs
 Pour boire les appelles.
 
 Car source de vie en toy gist,
 Et ta clarté nous eslargist 
 Ce qu'avons de lumiere.
 Continue, ô Dieu  toutpuissant, 
 A tout cœur droit te congnoissant,
 Ta bonté coustumiere.
 Que le pied de l'homme inhumain
 De moy n'approche et que sa main
 Ne m'esbranle ne greve:
 C'est faict les iniques cherront,
 Et repoussés trebuscheront,
 Sans qu'un d'eux se releve.