Mick Swithinbank - Coronach - ноты, текст песни (слова), перевод

Coronach (for the dead of the 5/7th Battalion, The Gordon Highlanders)
 Waement the deid
 I never did,
 Ower gled I was ane o the lave
 That someway baid alive
 Tae trauchle my thowless hert
 Wi ithers' hurt.
 But nou that I'm far
 Frae the fechtin's fear,
 Nou I hae won awa frae aa thon pain
 Back til my beuks and my pen,
 They croud around me oot o the grave
 Whar luve and langerie and blyness grieve.
 Cryan the cauld words:
 'We hae dree'd oor weirds,
 But you that byde ahin,
 Ayont oor ugsome hyne,
 You are the flesh we aince hae been,
 We that are bruckle brokken bane.'
 Cryan a drumlie speak:
 'You hae the words we spak,
 You hae the sang
 We canna sing,
 Sen daith maun skail
 The makar's skill.
 'Makar, frae nou ye maun
 Be singan for us deid men,
 Sing til the warld we loo'd
 For aa that its brichtness lee'd,
 And tell hou the sudden nicht
 Cam doun and made us nocht.'
 Waement the deid
 I never did,
 But nou I am safe awa
 I hear their wae
 Greetan, greetan dark an daw
 Till I their biddin dae.