Якобюс Клеменс нон Папа - Souterliedekens - Psalm 131 - ноты, текст песни (слова)

Den C.xxxi Psalm Memento domine David. Een liet in den hooghen Den Tenor Nae die wyse. Coemt doot tot my, rascht uwen ganc.  Ghedenct o Heer David dyn knecht
 End al zyn lydsaemheyden.
 Hi heeft ghesworen den Heer oprecht		
 Syn loef ten willen verbreyden 			
 Tot Jacobs God, dat is het slodt
 En heeft willen bescheyden.
 
 Yst dat ick gae in mine tent
 En climme op myn slaepstede
 Yst dat ick slaep myn ooghen toe sent
 En myn wynbrauwen mede
 Tot dat ick pladt, vinde Jacobs stadt
 Gods Jacobs huys met vrede.
 
 Wy hoorden, siet, dees stadt voorwaer,
 In Ephrata ghepresen
 En vonden die in velden aldaer,
 Daer boomen waren gheresen
 Wy sullen in zyn huys, gaen sonder confuys		
 Daert goet is in te wesen.
 
 Wy sullen daer aenbidden dan
 Den Heere, God aencleven.
 Al opter stede (nu hoort dit an)
 Al daer zyn voeten bleven
 O Heer op staet, u huys in gaet
 Ghi, end u arck verheven.	
 
 Justici laet u priesters syn
 Aen trecken nyeu gheboren
 U heilighen, vrolyck en bly laet zyn.
 om Dauid u vercoren
 ons niet onttrect, noch Christum bedect
 syn aensicht brengt te voren.
 
 God David swoer die waerheyt reyn.
 En sal hem niet frustreren.
 Ick sal dan laten u vrucht certeyn
 Op uwen stoel regneren
 Houden sy myn woort, u kindren: hoort
 Dat ick haer nu sal leeren.
 
 Op uwen stoel, u kinder altyt
 Hier sitten, en becliven
 Want God heeft Syon ghebenedyt
 Vercoren, in te bliven.
 Dit is myn rust, eewich myn lust
 Dees plaets woudick my toe scriven.
 
 Syn weduwe sal ick seer wel
 Helpen, ghebenedyen,
 End ick versaden haer armen sel,
 Haer priesters by mi vlyen
 Aen trecken haer salicheyt claer,
 Syn heylighen seer verblyen.
 
 Ick Davids hoorn sal brenghen by,
 Minen Christo een lanteerne:
 En sal bescamen al zyn party
 Dat sal ick doen soe geerne.
 Myn heylicheyt, op hem gheleyt,
 Sal blincken als een steerne.